Wednesday, November 02, 2005

نفسي وباخاف وهاعمل.. بس كده

نفسي وباخاف وهاعمل و.. بس كده



تلبية لرغبة بنوتة مصرية هذه إجاباتي على الأسئلة التي كنت حاملة هم الإجابة على معظمها خصوصاُ وإن الرقم 7 كثير... لكن بمجرد ما بدأت وجدت بداخلي أضعاف السبعة

سبع حاجات عايزة أعملها
د1- ......................د
د2- أكتب بطريقة منظمة في مجلة كذا وكذا وكذا
د3-أرتب أولوياتي رأسياً –دي نصيحة بابا من ربع قرن
د4- أتعلم فرنساوي
د5- أتعلم HTML وفوتو شوب
د6- أشتري لاب توب قبل المعاش
د7- أكوي لبسي مرة واحدة

سبع حاجات مش باعرف أعملها
د1- أخلي وشي ما يحمرش
د2- أنتهز الفرصة
د3- أضحك على حد أو أجامل
د4- أنسى اللي باحبهم
د5- أعمل رقاق
د6- أعزم
د7- أخبي


سبع حاجات عايزة أبطلها
د1- آكل شفايفي
د2- السكوت
د3- أكبت في نفسي
د4- أحس أوي
د5- العصبية
د6- التفكير اللي بيسرق النوم والراحة والتفكير أفقياً؛ مية حاجة على نفس الخط
د7- أقرأ كذا كتاب في وقت واحد وما أخلصش ولا واحد

سبع حاجات باقولها على طول+ اتنين
د1- " بس"، في آخر الكلام مع إنه بيكون فيه كلام بعدها!! د
د2- "المهم" للاستطراد، أو لتلخيص كلام اللي قدامي لو رغاي\ة أو لو مش طايقاه\ا
د3- آدي
د4- " نعم؟!" للاستفسار
د5- "الله يرضى عنك".. غالباً للعيال
أخواتي
د6- ما علينا، وريفر نايل
د7- ربنا يسهلها
د8- عباس السفلكي.. بكسر السين والفاء وتشديد اللام مع كسرها برضه
د9- لا والله؟؟!.. اندهاش وغيره

سبع حاجات باخاف منها
د1- الحب
د2- قلبي
د3- الفرقة
د4- الغيرة
د5- الوجه اللي مايديلكش أي معنى في الحياة
د6- الظن
د7- الضلمة


سبع حاجات نفسي فيها + اتنين
د1- أزور قبر ماما وآية.. مع إنه مستحيل..د
د2- أمشي كل يوم ع النيل ساعة
د3-أرجع زي ما كنت قبل ما اشتغل (أنا الآن- 15 كيلو)د
د4- أرسم
د5- أزرع قصايص ورد وريحان وملكة اليل
د6- أزور حبات القلوب وأصاحبهم
د7- أروح مكان رحته مرة وعشقته الشتا دي... + ...د
د1- أسافر أنا وهو لندن ولو يومين.. في المشمش
د2- قطة شيرازي بس بعد ما أعمل اتفاقية مع أخواتي


6 comments:

Bent Masreya said...

بيتهيئلى تخدينى معاكى أتعلم فرنساوى

انتى عارفة يا ديدي السبع حاجات اللى انت عايزة تبطليهم موجودين فيا كلهم ماعدا حكاية اكبت فى نفسى .. لو حاولت مش بعرف.. وانتى كمان اوعى تحاولى تكبتى فى نفسك.. فضفضى دايما
:)

كل سنة وانتى طيبة

Doaa Samir said...

والله يا بنوتة يا مصرية، الفضفضة دي حكايتها حكاية معايا... مش سهل عليّ إني أفضفض.. مع إن فيه ناس كتير تيجي تفضفض لي أنا وكتير من صداقاتي بدأت كده... بفضفضة!!! حاجة غريبة )؛ د

وإنتِ طيبة يارب :)

rony_al3geeb said...

على فكرة أنا كمان نفسى مووووووووت أتعلم أرتب أولوياتى بشكل رأسى .. لكن مين البشمندس عباس السفلكى ده؟؟ آآآآآه كنت هنسى أقولك بلاش موضوع القطة اللى طالع فى دماغك ده

Doaa Samir said...

لأ... إلا القطط.. ليييه يا روني؟!!دول جمال وطعمين خااالص. أنا على فكرة باحبهم من وأنا صغيرة بس أزمتي مع الكائنات الحيةإنها حية فبخاف من حركتها.. لكن في يوم من أيام رمضان كان في استضافة بيتنا قطة شيرازي اتهبلنا عليها أنا وأخواتي وكانت عاملة زي البيبي الأمور.. المهم، الفكرة طالعة في دماغي عشان أحمد وعمرو أخويا منذ زمن بس طلعت في دماغي عشاني بعد الزيارة السعيدة.د

أما عباس السفلكي فإحم ثم حدث ولا حرج!! ده يا آنستي الفاضلة شخصية حركية من ابتكار بابا في شبابه المبكر واتنقلت لي وهي تعني "أي حد" الواحد ما يعرفوش أو حاجة غريبةأو كده.. عارفة جودوت في مسرحية في انتظار جودوت بتاعة بيكيت؟ أهو ده جودوت العربي إلى حد ما.. زائد إنها إشارة للكائن اللي مامته داعية عليه ومأسوف على عمره!! إحم.. هل اتضحت

rony_al3geeb said...

أنا متفهمة موضوع عباس السفلكى .. بس موضوع القطط.......!!؟؟ بس هاحاول أحبها عشان خاطرك

موقع الاهلى المصرى 101 said...

نيس بلوج



زرتت موقعك واعجبنى كثيرا
اتمنى ان تعطينى رايك فى موقعك وشكرا لك يا غالى
موقع الزمالك

موقع جوجو الشامل

موقع الاهلى المصرى 101

موقع اخبار الكورة المصرية,الاوربية,العالمية,الاهلى

موقع النادى الاسماعيلى ,اخبار الاسماعيلى

موقع تعليم الفوركس للمبتدئين اون لاين

موقع شباب بيك