Thursday, March 30, 2006

فتافيت

فتافيت




عمرو أخي الصغير سافر البلد لإحضار حافظة أوراق بابا التي نسيها هناك لما سافر، وهو عائد ركب مع سائق مجنون كان يشرب وهو سائق وطاير في الهوا..ولما الناس يا عيني فتحت بقها قال: اللي مش عاجبه ينزل... وكل واحد أعدّ كفنه حتى وصلوا بسلامة الله

** * **

النهاردةبعد طول انتظار وشوق، جيت أركب السي تي ايه لقيت الناس واقفة على الباب الخلفي والباب مفتوح ومفيش مكان تحط فيه رجلك ع السلم زي أتوبيس النقل العام تماماً... الغريبة إنه وقف لي.. يمكن احتراماً..!! د

** * **

بعدها بقليل، جاء اللي بعده.. نظيف ومحترم وابن ناس .. بس التكييف بتاعه عامل زي الطاحونة... كان عمال يخبّط في رأسي

** * **

أمام حديقة الحيوان، شفت أبو قردان.. كان نفسي أهيص وأغني هييييه: "أبو قردان، زرع فدان، نصه حلبة ونصه لبان". فرحت إنه مازال يحيى بين ظهرانينا.. وافتكرت الأغنية دي لما كنا بنسمعها من الأطفال في البلد

** * **

مازلت في طريقي،،، عديت على حبيبي وصبحت عليه بعيني من فوق كوبري الجامعة.
كان بردان وهادي، وسايب كل حاجة في الكون تتعكس على جبينه... الشمس كانت بتدفيه، استمرأ مداعبتها ولمسها لملامح وجهه وجبهته العريضة، والمراكب لا تزال نائمة في حضنه

** * **

في مقابل شارع المنيل، وعند إشارة كلية الأسنان، كانت امرأة بدينة تجري وهي تعبر الشارع. كانت سعيدة جداً بأنها تستطيع الجري... فرحت لها وكنت سأضحك لولا الملامة.. لكن... لكن المشكلة أنها لم تكن تجري وحدها..!!!د
** * **

ومروراً بالقصر العيني الفرنساوي، رأيت مولوداً جديداً يخرج من هناك.. كانت والدته خائفة جداً وهي تعبر الشارع برفقة والدتها الفرحانة. كانت تضمه إليها بكل كيانها بخوف وحرص.. ضممت ذراعي المعقودين على حضني بلا وعي وكأنه ابني. وأحسستُ بها تتمنى أن يعود لرحمها في تلك اللحظة!! د

** * **

في شارع القصر العيني أمام مبنى دار الحكمة العريق ببوابته الضخمة الثقيلة ذات الحلية النحاسية في منتصفها، وفي أثناء قيامه بعمله، أشفق عامل النظافة العجوز على مكنسته والجاروف وعربته "الملصّمة" فتركهم ليستريحوا قليلاً بينما جلس هو القرفصاء مستمتعاً بحديث البواب... لكن ما علاقة الحكمة بالطب ولمَ سمي الطبيب حكيماً؟!!د

** * **


د"بنك باركليز"... يعجبني وضوح يافطته والخط المكتوبة به، وتدهشني كمية المصدات والعساكر الكامنة أمامه بالليل والنهار.. بعده بكم سنتيمتر يوجد البنك الرئيسي للتنمية والائتمان الزراعي... وحيد ومغبر ولا يوجد عسكري معبّره ومكتوب اسمه بخط جميل غير مقروء... اشمعنى.. ده بنك القمح ياناس.. بالتحديد فصيلة الجميزة10 اللي عشان نحقق الاكتفاء الذاتي هنصدرها لأمريكا إن شاء الله قبل ما ندوق طعمها.. اسألوا الأستاذة سكينة فؤاد وبابا لأنه كان متابع الموضوع قبل ما يكتموا أنفاسه ولا يتركوا غير السؤال

** * **


في ميدان التحرير، وقف خمسة سائحين في انتظار الفرج... مش عارفين يعدوا الطريق.. لا تزال لدينا مهارات بهلوانية خاصة في مصر

** * **

في "الحوداية" أو اللفة اللي فوقها كوبري أكتوبر وهنطلع منها على عبد الخالق ثروت ورمسيس..لا أعرف اسم الشارع أو المكان، رأيت إعلاناً لبنك
ABC
الخلفية خضراء مزهزة وعليها صورة لوزة بقشرها أو دومة، ما عرفتش أميز، وفيها سستة الجينز (نحاس وعريضة) ومكتوب "سهولة التعامل"... عجبتني فكرة الإعلان.. وافتكرت "يالذيد يارايق" بحبه أوي.. هو وإعلان دهانات يوتن..
Jotun
باحلم إن إعلاناتنا تبقى كده .. من غير رغي.. ولا هزّ.. ولا دهننة

** * **

قبل ميدان رمسيس وقفت صورة حسني مبارك على الرصيف، لم يعطف عليها أحد بـ "كحة" أو شيء مما يخرج على إثر الكحة لتوضح ملامحها وتزيل عنها الغبار المتراكم من ربع قرن ولو ببقعة

** * **

نقابة المهندسين.. يآآآه يا نقابة المهندسين...بحبها وبتخليني أبتسم في معظم الأوقات.. ذكرياتي معها صيفية.. هي المكان الذي كان من المفروض أن نجتمع عنده أنا والصُحبة للنطلق في رحلتنا إلى رأس سدر.. تركوني ورحلوا مع إني تأخرت عنهم ساعة إلا 10 دقائق -فقط- وقضيت العشر دقائق في البحث عن أي نمرة تليفون .. لحد ما ربنا سترها ولقيت نمرة محمد هشام.. ولحقتهم أنا وعمرو أخويا.. احتفلوا بيّ جداً طبعاً خصوصاً لما وصفتهم "بالخونة" وقلت لهم إني يدوب تأخرت ساعة..وكااااان يوووووم يارب عوده يارب

** * **

أمام مستشفى الهلال دائما ما رأى تلك اليافطة المكتوب عليها كذا.. كذا.. كذا.. دكتور فلان الأخرس.. تذكرت يافطة تقع عليها عيني كثيراً صدفة في كل مرة في طريقي إلى أو من المجلة لواحد اسمه: (اسم من أسماء الشهور العربية)بطيخ، وافتكرت سمير كمونة، عبده تلوث، فلان الفولي، النحاس، الخشاب، السباعي، المصري، الكفراوي. الأسماء تجذب انتباهي وأستغرب من تفصيلاتها المتنوعة من مشتقات الأكل، أو نسبة للحِرَف، أو الأماكن أو الحيوانات ولا أجد تفسيراً لذلك.. ولقيتني رجعت للوراء وبالتحديد سنة خامسة ابتدائي وحكاية "نِكْلَة"؛ "في نادي الأصدقاء في صفحة صدق أو لا تصدق في جريدة الأهرام، أرسل طفل حكايته يقول إنه متفوق ويحب الرسم ومعروف بذكائه في المدرسة وبين كل من في سنه.. لكن مشكلته إن اسمه نكلة.. واسمه مثار لسخرية الأولاد.. كانوا يقولون له امتى تكبر وتبقى تعريفة يا نكلة؟! وامتى تكبر كمان وتبقى قرش... كان نفسه إنه يغير اسمه وكلم باباه لكنه رفض.. ومش عارف يعمل ايه.. ومش متخيل إنه يكبر ويكون إنسان له شأن ويكون اسمه نكلة"... وأنا إلى الآن لا أعرف إذا كان لا يزال نكلة والا غير اسمه

** * **

بعد غمرة على طول، يوجد ركن ورود صغير محفور في حيط مهجور وفيه كانت عصافير الجنة مخاصمة بعضها وأعطت ظهرها لواجهة المحل والشارع والناس
لكنني رأيتها ((: د
** * **

أمام مستشفى الدمرداش، كان الطبيب الوسيم والشيك في نفس الوقت يحاول جاهداً النزول من التاكسي والطريق لا يسمح له.. وعلى بُعد ياردات في الجنينة بين المستشفى والمعهد الأكاديمي لجراحات القلب تحت الإنشاء.. رقد أحد المواطنين أو الغلابة على الخضرة واضعاً الجرنال على وجهه ليحجب الشمس
** * **

د- يا م.ع.ر.. يا ابن الوسـ..د
د- أستغفر الله العظيم، حسبي الله ونعم الوكيل
قلتها بحنق.. قطع خط تفكيري ولن أستطيع أن أكمل عملية الشوف.. السائق شتم واحد شتيمة وحشة جداً تجرح أذني كلما سمعتها مع أني مش عارفة معناها مثل كل أخواتها.. الثانية مفهومة طبعاً
الله يحرق لسانك ع الصبح يا "مش أخي"..ولا يبارك لك على الرزق اللي كسبته ساعة ماشتمت
** * **

د"غصب عنهم.. مفيش فايدة فيّ.. هاكمّل برضه"د
أمام جامعة عين شمس، كان الشباب والفتيات يعبرون الشارع.. زهور مفتحة ويرتدون ألواناً جميلة.. وفاتحين أذرعتهم للدنيا.. شكلهم لسه في سنة أولى.. تمنيت أمنية وقلتها لهم في قلبي وأنا عارفة إنها عبيطة.. قلت: ياريت تخرجوا منها بنفس الألوان والصفاء..!! مُحااال
** * **

د"يا سلااااام"... وصلت لمنشية البكري.. تحفة خضراء.. أو كما قلت مرة باحس إني في زفة
اتمنيت لو إنهم يعملوا "سي تي ايه" بدون سقف.. وكان نفسي إن الإشارة تفضل حمراء مع إني هتأخر على الشغل.. عايزة أتعلق بأشجار الكافور والفيكس والأشجار التانية
ملحوقة إن شاء الله
** * **

دخلت عليهم على طول ونسيت أدق الكارت فتولت نانسي صاحبتي تلك المهمة
صباااح النوووور ... أنا جيييت نورت البييييت

إبراهيم -زميلي وأخي- قال لي: إنتِ شاربة ايه؟ شكلك النهاردة ضاربة بالقرش كله.. وعرفت إن القرش اللي يقصده طلع بعيداً عن القرش والساغ والفلس والدرهم ولا علاقة له بالفلوس

ماعلينا
حاسة إن فيه أبواب اتفتحت جوايا وزهور زي ما فيها بنفسج، فيها معاه السوسن
ومش عارفة ليه
(((:

17 comments:

Nour said...

مش مهم تعرفي ليه يا دعاء

المهم ربنا يديمها عليكِ يااااا رب

:)))

aiman said...

ربنا لما يرضي علي عبيده يحبوا ..
و يتحبوا ...
ويشوفواالكون كله بعينين جميله .
رزقك الله صفاء السريره ... لتنعمي بعبادته ...
يارب

kalam said...

ايه الجمال ده
عارفه بعد ما قريت البوست ده
كان نفسى قوى اقولك
صباح الفل

Doaa Samir said...

نوران

لأ كان نفسي أعرف.. فضول بقى..تقولي ايه؟! د

يارب آآآميين


أستاذ أيمن

الله يكرمك... دعواتك الجميلة خليتني أقول آآآميييييين من قلبي وهو بيرتعش


كلام

أهو هو ده اللي حصل.. كأنك قلتها بالظبط
صباح الفل
((:

Hend Nour said...

يا صبـــــــــــــــــاح الإنشراح والبهججة... وده اول كلامنا...د

تاني كلامنا ... اتضح بعد قراءة البوست اللي سعادتك كاتباه وكنتيجة لمعرفتي الوثيقة بشخصك الكريم و"المجنون" ان الحاجات اللي شفتيها دي كلها مش بالحلاوة ولا البهججة اللي انت حاساها دي لأن أمة لا إله إلا الله بتعدي من نفس الطريق كل يوم وبتشوف حاجات مختلفة... يبقي القصة وما فيها انك بتشوفي زي ما جواكي عايز يشوف مش زي ما عنيكي شايفه حقيقي... وكون ان جواكي شايف البهجة والإنشراح ده يبقي يا ألف نهار ابيض وعقبال متحلي كل سلبيات مصر في عنين شبابها كلهم ان شاء الله... العواف

hesterua said...

طبعا
مش هتفهمينى غلط
لما اقولك عنيكى حلوة
عشان بتقدرى تحسى وبعدين تشوفى الجمال فى التفاصيل العادية والمعتادة اللى بتعدى بيها وبتمر بيكى
فعلا احلى حاجة اننا نشوف الورد من غير شوك وربنا يديمها عليكى نعمة

Moia said...

عشان انتى جميله بتشوفى كل حاجه جميله .. يا رب دايما كل حاجه حلوه فى عنيكى يا رب :)))

yawp said...

i backtracked this on my blog doaa :) you know the link

Doaa Samir said...

هند

يا صباح الانشراح والبهججة كمان النهاردة يا هنّوود.. وده أول كلامي
تاني كلامي بقى، والله أول مرة حد يقول عليّ "مجنونة" بس ده في حد ذاته إنجاز!!د
أما إذا كانت أمة لا إله إلا الله بتعدي من نفس الطريق ومش بتشوف اللي أنا شفته، فربنا يعينهم بجد.. وبالنسبة لتفسيرك أنا ليه شفت ده والقصة وما فيها، فدي وجهة نظر أنا أحترمها.. والله يعافيكِ وصباحُه قشطة يا سيدي



Hesterua

لأ طبعاً مش هفهمك غلط يا أحمد
هي عيني صحيح مش زرقاء ولا خضراء.. بس أجمل ما فيها إنها مش حمراء.. اللهم إلا وقت اللزوم ومع اللي يستاهل
((:


Moia

يا مرحبا,, يا مرحبا.. ميرسي ليكِ يا Moia مع إنك مش شفتيني.. واللهم آمين.. يارب حليّ الدنيا بجد سواء في عيني أو عين غيري
((:


Yawp

يا سلااااام.. ميرسي ليك.. حلوة أوي الفكرة اللي عملتها دي
يسعد صباحك

Geronimo said...

صباح الخير ياسيدتي
دعينى انحني لكى احتراما
يا سيدة المنمنمات
ورغم تعديكي على تخصص وهو الفتافيت
الا اننى اكتشفت ان فتافيتي جنب فتافيتك جعاليص (وجعاليص هنا تعنى الحاجات الضخمة المكلكعة لانه يبدو والله أعلم ان الحياة قد بخلت عليكي بثقافتها الخاصة بالجعاليص والشتائم والذي منه واقتصرت روحك الرقيقة وكلماتك الرايقة على الفتافيت والمنمنمات والورود والسوسن والبنفسج )
زمانك بتقولى صباحو قرر
وبتفكرى تنادى مسرور يقطع رقبتي اللى لسه محنية احتراما لجمال وحلاوة بوست جلالتكم
وحشتينى يا مليكتى
ونفسي اشوفك
وابكيتنى وخليتنى معرفتش انطق فى البوست اللى فات
بحبك يا ملكة الاشياء الصغيرة

ensanbey7ess said...

على الرغم من انها فتافيت الا ان جواها معانى كبيرة جدا بس اللى يفهم

اهنئك على قوة ملاحظتك

زبادي said...

شئ جميل لما تكون العين بتشوف وتحس
وأنتي عينك بتحس قبل ما تشوف .. ورغم طول التدوينة إلا أنني تمنيت أن تطول
تحياتي

Doaa Samir said...

إنسان

اسمك جميل جداً... يخليك بالفعل تشوف وتحس اللي جوه الفتافيت
((:


زبادي

آه صحيح، أنا اكتشتف كده برضه لأن الناس اللي بتمشي في نفس الطريق زي ما قالت "هند" مش بتشوف اللي شفته... والفتافيت لما كانت بتتكتب في دماغي وأنا باشوف مش كنت متخيلة إنها طويلة كده
ميرسي ليك يا زبادي
((:

Doaa Samir said...

جيرو

صباح النور يا أميرتي... أشكر لحضراتكم مروركم الملوكي على مدونتنا المتواضعة.. تشكرات.. أما بالنسبة لفتافيت سيادتنا فلم أكن أعلم أنها تخصص أو أنها مقتصرة على أحد بعينه لأعتدي عليها.. ويؤسفني ألا أزف لسيادتكم خبر أنني لم أطلع على فتافيتكم.. لكن على أي حال، نرجو من عيون سيادتكم أن تنعم علينا بالعفو فلم نكن نقصد أبداً إهدار دمعها وتحمير لونها.. وأنا كمان نفسي أشوفك
و.....
وعندك ذلك أدركني الصباح وسكتُ عن الكلام المباح
وبدأ الديك في الصياح

((:

Ahmed Shokeir said...

دعاء

اشكرك على هذه الرحلة الجميلة .. بس بصراحة انا تعبت وإبتديت انهج .. دانتي لفيتي مصر كلها

بس حلوة اوي العدسات اللي انتي لابساها دي .. بتخلي الحاجات حلوة اوي

وده يوضح الفرق بين رؤية عين ورؤية عين اخرى

rony_al3geeb said...

دى من المرات القليلة جدا اللى باشوفك فيها طافحة تفاؤل .. عشان كده حاسة ان ده يوم تاريخى

كلمه said...

--- tasfeeek 7ad ----
---safafeer men kol na7ya----
heya eldonia 7elwa keda???? .... da e7na mesh 3aysheen yaba ...
mafeesh 7aga tet2al 3`eer (TO7FA)