Saturday, April 08, 2006

أمل مبلول

أملٌ مبلول


أُذِن لصلاة الجمعة، وبدأ الخطيب في إلقاء خطبته في خطى الحبيب المصطفى. صليت وسلمت عليه كلما وصل اسمه إلى سمعي. ونظرت إلى سماء لا أراها رأي العين داعية الله بأشياء جميلة وبسيطة في نفسي. مازال بداخلي يسكن أملٌ مبلول.. يقبع منكفياً على نفسه، ملتحفاً ببلله في ركن قوي فيّ لا ينفك عن التشبث فيه

ارتعش رعشة ضعيفة فلم ينفض الماء المالح عن نفسه ولم تخفّ حركته

لم أعد أحتمل برده وبلله وثقل خطواته.. وبلا مقدمات، زارتني قصيدة "شط بحور"المحببة إليّ لبهاء جاهين .. والتي منذ سنتين لم أكن أحمل لها غير معناها الحميم في حسي الشاعري. ثم منذ سنة ونصف في رمضان 1425، زادت عليها ابتسامـات الصُحـبة وشرود بعضهـم ونظراتهـم المندهشـة لما ألقيتها عليهم فـي"سـيلانـترو" بعد الإفطار، فشاع على إثرها في الديار أنني "إنسانة". لم أكن أدرِ أنني في يوم من الأيام سأتذكرها وتدمع عيني، ولم أكن أدرِ أنني سأرى في كلماتها ملامح ناس وأحداث أيام.. ولم أكن أتخيل أن معانيها المجردة ستتشكل في كيان ما!!د
لم أعد أحتمل.... قمت واعتليت منصة البيت الفاضي وبعلو نبض قلبي ووجع روحي أنشدت

ما أقدرش أنسى
وأنا عندي من السنوات خمسة
البنت اللي اسمها شط بحور
وطيور البحر على المرسى

بتمر سنين
والقلب مع الوقت بيقسى
بس الودعة ف جيبي لسه
اللي اديتهالي
شط بحور

وشوشت البحر ووشوشني
وبنيت الرمل
وباش مني
وحبيبي سبح لغروب الشمس
بنادي له صوتي اتحاش مني
ومراكبي في الرملة غارزة
بس الودعة ف جيبي لسه
اللي اديتهالي
شط بحور

ونسيت البحر وأيامه
والعالم خدني في زحامه
اللون الأزرق راح مني
والأصفر ساقني قدامه
وإن قلت لقلبي
خلاص انسى
ألقى الودعة
ف جيبي لسه
اللي اديتهالي

شط بحور

10 comments:

kalam said...

الله
اول مره اقراها
انا متخيلك وانت واقفه لوحدك فى البيت وبصوت عالى ومدمعه وعماله تقوليها
انتى جميله يا كروان اوى

زبادي said...

توجد كلمات تبقي وقادرة علي إستدعاء شخوص وأمكنة لتصنع منهم ذكري تضاف إلي معانيها .. فقط هذة الكلمات هي التي تبقي وتعيش
أما عن الأمل المبلول خير من أن لا يكون هناك أمل .. سوف تشرق علية شموسك لتجفف الماء منه ويبقي لك أمل أبيض بعرض السماء

Doaa Samir said...

Kalam

:">
ميرسي ليك يا كلام.. اللي يسمعك يقول ده إنت شفتني وعارفني
((:


زبادي

صحيح، فيه كلمات تستمد معناها من أشخاص أو أمكنة أو أحداث ارتبطت بيها. سر وجودها فيهم.. فيما عدا ذلك، تكتفي بمعناها اللفظي وفي حدود النص أو السياق اللي هي فيه ولا يكون لها أبعاد تانية.. وبالنسبة لأملي المبلول جوايا، يارب بالفعل الدنيا تشمس عشان ينشف ويدفى

((:

aiman said...

دعاء
من اخوكى الكبير ....
شمسك جواكي ... و بردك برضه جواكي
ادعي لربنا يملا قلبك دفا ... بحبه

Anonymous said...

يخرب بيت أبو تواضعك يا شيخة
!

Geronimo said...

جامدة يا كروان
غنى كمان
الغنا مش هيموتك
لكن كتم الغنا هو اللى ........

حتى لو كان الامل مبلول

الا صحيح جبتي منين امل مبلول دي

Doaa Samir said...

أستاذ أيمن

بالفعل، أحيانا باحس بشمسي جوايا.. وهي اللي مسئولة عن وجود الأمل جوايا.. لكن نوعه يختلف حسب درجتها..فإذا كانت شديدة يكون الأمل في عنفوانه ونشاطه.. وأنا لما باقول شمسي أقصد إيماني بربنا وحسن الظن فيه وهو ده اللي معيشني.. لكن أحياناً برضه باحس إنها استنفدت كل طاقاتها فيّ ومش سيبتها تسترد عافيتها، فأشعر بإن الأمل كسيح وثقيل ومبلول... أو ممكن تتقلص مساحة الأمل ويسحب عليها البرد بسقيعه.. وأنا في أحلك تلك الأحيان
يارب ما يحصل ده تاني لأني نشفت من البرد واكتفيت
آمين


جيرو

مع إني ماغنيتش ساعتها، وأنشدت بس.. إلا إني أحيانا باحس إني عايزة أعلّي صوتي بالغنا..
نيجي بقى لـ "الأمل المبلول"، إإإمممممممم، والله هو ده اللي حصل

Doaa Samir said...

مجهول الهوية



ميرسي ليييك ولذوقك!! أكيد حد قال لك إني مغرورة!!د

/:)

مش قدرت أعرف إذا كنت بتتريق ولاّ بتسخر ومشتاقاتها ولاّ ايه بالظبط؟؟!!د

:-w

وليد said...

كثيرا ما تداهمنى مثل هذه الحالة حين أسمع مقطع من أغنية مشهوره كنت قد سمعتها فى استراحة العلمين أثناء فترة تجنيدى فى السلوم

ويبقى الأمل
حتى لو كان مبلول

aiman said...

اخلصي لربنا اوي يا دعاء
حبيه اوي
زي ما قلتلك قبل كده .... تحبي و تتحبي

عن النبي صلى الله عليه وسلم قال : إذا أحب الله العبد نادى جبريل إن الله يحب فلانا فأحببه فيحبه جبريل فينادي جبريل في أهل السماء إن الله يحب فلانا فأحبوه فيحبه أهل السماء ثم يوضع له القبول في الأرض

يـــــــا رب