Monday, August 07, 2006

وهكذا... أصنع صباحاتي

وهكذا,,,د
أصنع صباحاتي




"صباح الورد والشوكولاتة بالبندق والقهوة"

رنت الكلمة في أذني مع أنها وصلتني ساكنة في إيميل من العزيز جداً والصديق بجد حسام مصطفى. يعرف مفرداتي جيداً ويفهمها ويحترمها مهما كانت صغيرة.

صباح الورد والشوكولاتة بالبندق والقهوة
رددتها بيني وبين نفسي
أحيانا أستيقظ فلا أجد الصبح!!د
وقد أجده في عزّ الليل!!د
دائماً لا أرهق نفسي في محاولة البحث عن السر أو التأكد إذا كانت موازين الكون قد انقلبت.
وبالفعل، توجد صباحات من صباحاتي من الورد والشوكولاتة بالبندق والقهوة بمعناها الحرفي جداً.. طبعاً كان فيه صباحات أبكي عليها كانت كذلك بالمعنى السامي الحقيقي.. الذي بين كل بندقة وبندقة في الشوكولاتة، وبين كل بتلة وبتلة في الوردة، وبين ذرات القهوة، وبين أنفاسي ورائحة الورد والصبح.

لن أحكي عن الصباحات التي كانت "ورد وشوكولاتة بالبندق وقهوة" بالمعنى الشفيف الذي فيما بين السطور والتي كانت تكون هكذا لأنها بالفعل كذلك.. وكانوا لما يروني يقولون: ايه الإشراق ده يا دودو؟؟!! شكلك فيه إإإنّّ نّ نّ!!د
((؛
إنما سأحكي عن صباحات "الورد والشوكولاتة بالبندق والقهوة" بالمعنى الحرفي.. تكون لما أصل لأعلى درجة من الاكتئاب والتوهة والخوف. حينما تتحد ذرات الزمن، بالتراب، بكذبة كبيرة، بعلامة استفهام سوداء، تعقبها علامة تعجب غير منقوطة، برائحة البلاستيك السايح فيذكروني بوجع أصاب مضغة حية... ويتعاظم التكوين حتى يستحيل إلى طاقة جبارة أخاف على ملامحي ودواخلي من عبثها.

ماذا أفعل؟

أقوم لتجهيز لبسي وأتعمد أن يكون متناسق وألوانه فيها بهججة.. وأندهش لما أجد الناس يومها يقولون لي: ايه الشياكة دي وايه الروقان ده؟! لكنهم بعدها يرجعوا يسألوني مالك؟؟


آجي المجلة بدري جداً، وأمر على محل الورد وراءنا هنا لأشتري منه ورد من توليفي أنا.. وأمرّ أشتري شوكولاتة -وبالتحديد بالبندق لأني أعشقها أكثر بالبندق، وأطلع فوق في المجلة.. أقص أعواد الورد من تحت بطريقة مائلة، واملأ نصف كوب زجاجي كبير لونه أزرق بالماء. وأضع لعبتين سمك صغير موجودين هنا في الكوباية بعد ما أختار لونهم بحيث يكون فيه تباين بين لون الورد وبينهم من خلال الزجاج الأزرق... وأجفف الكوباية جيداً والتي لم تعد كوباية..استحالت فازة. أروح لأضعها على مكتبي في مقابل الشباك والشمس حتى يتخللها الضوء إذا سـُمح له بالدخول!!د

بالليل بيتُ النية لأصحى بدري.. بدري.. بدري لأصنع لي صباحاً من صباحاتي... ارتديت طقماً جديداً لم ألبسه كثيراً؛ جوب برتقالي غامق كقمر الدين، وجاكت أبيض بورد أبيض مطرز الحواف، وطرحة تتفاوت درجاتها بين السيمون والبرتقالي بورد بلدي ملّون.
ذهبت لمحل الورد، وكونت بوكيه صغير -برضه- من توليفي أنا: ورد ديزي أزرق، ووردة بلدي صفراء فاتحة، ووردة أخرى برتقالي مشرأبة.. مع العشب الأخضر وفروع خضراء بورود بيضاء صغيرة تشبه نفش الجليد المتساقط
احتضنتها في الطريق القصير من محل الورد للمجلة.. احتضنتها وداريتها عن العيون الفارغة الجالسة على المقهى.. وفعلت مثلما أفعل دائماً.. وذهبت حيث حظر تجوال النور والشمس والبراح لبارتيشن أصبح مكاني بعد أن غيرت مكتبي.. وضعت الكوباية/الفازة لكن صباحي لم يكتمل.. وإلى أن يتم ذلك، يكون محمد -الأوفيس بوي- عمل لي فنجان قهوتي الصباحية مع تقليل السكر حتى أشعر بطعم الشوكولاتة وهي تذوب في فمي مع قرمشة البندق.


وهكذا,, أصنع صباحاً من صباحاتي بالورد والشوكولاتة بالبندق والقهوة لأرى الصباح إذا لم يطلع الصبح ولأداري عني ما لم أستطع محوه بعد!!د





**************




21 comments:

Omar said...

صباح الفل يا جارتي العزيزة، وانا باقول برضه إيه الإشراق ده، يا رب دايماً على طووووووووووووول

salateenoo said...

انا أعتقد أن الإشراق والتألق والشفافية التي يراها الإنسان فيما حوله ...إنما تنبع من داخله ...أنت إنسانة جميلة من داخلك...تحبين أن تسمتعي بكل ما حولك ...أراك دائما تنظرين إلى الجميل فيما حولك من الأشياء... دائما مبتسمة...دائمة مستمتعة...نعم....بيني وبين نفسي دائما ما أدعوك الإنسانة المستمتعة...وليتنا كنا مثلك...
بس قوليلي ...إيه رأيك في المكرونة :)

Doaa Samir said...

عمر

حمدا لله ع السلامة يا جاري العزيز جداً جداً.. خصوصاً بعد ما بقيت زول وتان-تان وكده

يارب يبقى إشراق بجد يا عمر
((؛


سلاطينووووووو

يا مرحبا يا مرحبا بيك باك
الله يخليك يا أحمد يارب أبقى كده ومش أتلوث من جوه
مسميني "المستمتعة"؟! دمه خفيف التعبير ده
صح، أنا بحب أستمتع بكل حاجة جميلة متاحة ليّ وأعتقد إنك كده كمان وإن اختلفت طرق الاستمتاع وملامحه
وآخر حاجة استمعت بيها قبل تعليقك كانت المكرونة
جديدة ومميزة

تسلم اقتراحاتك
((:

أبو أمل said...

يسعد صباحك
يا ست ام محمد
؟؟؟؟؟؟؟؟؟؟؟؟؟
إيه الروقان ده
تحياتى
زورينى

جمال الدولى said...

الله يلون صباحلتك بلون الفل والورد
والياسمين
تحياتى
مدونتك حلوة
الرجاء التواصل والنصح
زورينى

Doaa Samir said...

أبو أمل

يا مرحب بيك عندي لأول مرة وإن شاء الله تتكرر

اللهم آمين ويسعد صباحاتك إنت كمان
أما الروقان، فدي خدعة كبيرة أوي كل الناس بتقع فيها مع إني مش قاصدة أعملها
ماعلينا
إنما مين ست أم محمد دي؟؟
هازورك إن شاء الله.. أديني باقول لك عشان تجهز الضيافة
(:


جمال الدولي

ميرسي ليك يا جمال وأهلا بيك
بس فين البلوج بتاعك؟

Mamdouh Dorrah said...

يسعد صباحك دايما يا قمر

Zanoubia said...

جالكسي؟ و كمان بندق؟ هتنزليني دلوقتي حالا أجيب واحدة

Doaa Samir said...

Cortex

ويسعدك صباحاتك كلها دايماً يا دُك
(:

Zanobia

أهلا بيكِ عندي لأول مرة.. معلش، ليكِ عليّ لو شفتك أجيب لك شوكولاتة جالكسي بالبندق وإنتِ عليكِ القهوة
(:

Moia said...

صباحك بحر جايب نسمه بتحلم ببكره على رأى صديقى العزيز جدا :)))
يجعل صباحاتك كلها ورد وديزى وشيكولاته بالبندق يا احلى ورده :))

kalam said...

ايه الروقان ده
اكيد ده بيختلف عن صباحي انا مثلا
المكون من سندوتشات الطعميه المحشيه والكانز
بس بجد بجد
صباحك فل

Doaa Samir said...

Moia

ازيك يا مويا؟؟ الله يسعد صباحك دايماً يارب..
يااااااه، كلمة صديقك العزيز خلتني أتنسم الاسكندرية في الحروف
"بحر جايب نسمة بتحلم ببكرة".. يا سلااااااااااااااااااام
:*
ميرسي ليك يا جميل.. يارب آمين بس مش تكون بسبب الحاجات المش كويسة اللي بتتحد مع ذرات الزمن بالتراب


Kalam

آآآه من كلمة "الروقان"... عايزة أصدقها بس مش عارفة
هههههه
ضحكتني والله.. صباحاتك من سندوتشات الطعمية والمحشية كمان مع بيبسي وأخواته
دي صباحات مقلية
بس إن شاء الله تكون صباحات فل ليك إنت كمان

Anonymous said...
This comment has been removed by a blog administrator.
farida said...

هو ده المزاج يا دعاء
عندما أسميت موقعي www.mourning-cafe.blogspot.com
رغم إني مسجلاه فريده .. ده لأن اكبر متعه عندي هي مج النسكافيه الصبح و انا لوحدي في أوضة المعيشه الجميله اللي دايما بلكونتها مفتوحه للنور و الشمس... كان حلمي في الحياه الاقي رفيق يفهم المزاج ده و الهدوء النفسي ده ... عندي صديقه لكن هي دلوقتي بعيد .. هي روحي هي نفسي اللي بستريح معاها هي اللي كنت لما اتضايق أروح آخد قهوة الصبح معاها و هي الورد و كلامها الشيكولاته.. و كان لي صديق بس إفترقنا كنا 8 الصبح نفطر مع بعض و ساعة ما اكون متضايقه أدور عليه
ناس كتير مش بتفهم المزاج ده .. مش بتفهم إزاي الحاجات الصغيره بتفرق مع اللي زينا جدا

farida said...

على فكره انا كتبت العنوان غلط
http://morning-cafe.blogspot.com
معلش العتب على السبلينج

Anonymous said...
This comment has been removed by a blog administrator.
شيماء زاهر said...

مساء الفل يا دعاء..أنا بجد مش لاقيه كلام أقولوا...لما أشوفك إن شاء الله :)

Doaa Samir said...

فريدة

لأ والله يا فريدة هو مش مزاج.. يعني مزاج ده لما يكون الواحد رايق ومرتاح أو زي ما قلتِ هدوء نفسي.. أنا بقى باعمل كده لما أفتقد الهدوء النفسي اللي بتقولي عليه ده، ولما -زي ما كتبت- مش ألاقي الصبح في الصباح..

ولأمانة برضه، أحياناً بيكون مزاج بس قليل جداً.. بس عندي اقتراح، ما تيجي تشربي معايا قهوتك الصباحية مع الشوكولاتة طالما إن صاحبتك مسافرة

أنا من الناس اللي بتفهم أوي الحاجات الصغيرة اللي بتقولي عليها.. حتى ليّ قصة مسميها كده
((:


شيماء

مساء النووووور الصبح يا شوشو -لأن الساعة دلوقت العاشرة إلا ربع صباحاً، الله يخيكِ يا جميل
لما تشوفيني بقى إن شاء الله.. بس مش تنسي
*:

Ahmed Shokeir said...

دعاء

عجبني اللون البرتقالي أوي عندك في الوردة والبوست والجورب والطرحة وكانه يحاول ان يشرق شمسك في يوم تستيقظين فيه صباح لم يأتي

بالرغم من اني لاأشرب القهوةولا السيجارة إلا أني أشعر بأهميتهما لدى زوجتي خصوصا في الصباح

كثير منا يشرب النسكافيه ويرى الورد ولكن نادر من يجد فيه متعة حقيقية

بس دورت على السمكتين في الكوباية الزرقا اللي في الصورة مالقيتهاش

Doaa Samir said...

أستاذ أحمد

اكتشفت تعليقك النهاردة وفرحت بيه مووووت...
بس فين الطرحة.. مش فيه طرحة في الصورة!! اللهم إلا الطرحة اللي أنا لابساها ومش صورت نفسي


أنا مش ليّ مزاج معين.. يعني مش أسيرة كيف لشيء محدد.. بس أحياناً القهوة الصباحية بتكون هي الساعة اللي تقول لي إن الصبح طلع إذا كنت مش حسيته اليوم ده
والورد باموت فيه مع إني كل مرة أشتريه بيصعب عليّ لأنه في يوم هيدبل وهارميه... بس بأجل الألم ده لساعته

السمكتين بقى، فللأسف مش لقيتهم... ودي أول مرة أحط فيها الورد من غيرهم

gladto said...

IT IS NICE,WHY I CAME HERE,I AM CHINESE,THANK YOU!I T IS NICE FOR ME TO VISIT HERE