Monday, September 04, 2006

أنـا ردّ حــوادث!!د

أنـا ردّ حــوادث!!د




نويت عبور الطريق وقد خفت أقدامي وحركتي رغم أن نفسي كانت تنوء بحمول أخرى.. انتظرت حتى قلّ عدد السيارات المنطلقة بلا تردد نحو "لا تـدري". مررت من أمام ميكروباص جديد بعد أن أشرت له بتهدئة السرعة كعادتي دائماً وأنا أعدّي
خرج لي وحش جميل كاسر اسمه (بي.إم.دبليو).. كان يتجاوز الميكروباص بسرعة لا تقل عن 120من أقصى اليمين لأقصى اليسار
تراءى لي الموت للمرة الـ....إإإإممممم... (كثير) لا أذكر بالتحديد!!د
كانت أمامي موتتان؛ إما إني أتفرم بين الميكروباص وبين الوحش الكاسر، أو إني أخفف من بشاعة منظري على تلك الحال على حبيب قلبي بابا الذي اكتفى من مآسينا، فأختار أن أموت تحت عجلات السيارة دون هرس أو تشويه

بدراسة سريعة جداً عرفت أني لن أستطيع الوصول للرصيف قبل السيارة المسرعة ما تعديّ عليّ. ولم يعد هناك مجال للرجوع للرصيف الأول... فأنا محشورة الآن بين الميكروباص والأخرى قادمة
هداني ربنا إني أجري في اتجاه (البي.إم) إلى أن يخفف من سرعته وقد بدأ بالفعل وعلا صوت الفرامل المفزع والمخيف
لا أريد أن أموت هكذا
جريت...د
الميكروباص حدف الجهة الأخرى ليتفاداني أو يتفادى (البي.إم)د
جريت بعزم ما فيّ
لحقتني السيارة
وخبطتني
كان لا يزال فيّ القدرة على الاستيعاب فرفعت نفسي... حملني الكبوت بقسوة وهبددتي قوة الردة على الأرض

الحمد لله.. الحمد لله على كل حال
فيه كدمة كبيرة في رجلي "الموعودة"... ورجلي ثقيلة جداً وألمها أكبر من الكدمة. محمد أخويا شاكك في نزيف داخلي –كما حدث من قبل- لكني تجاهلت شكه. وجئت المجلة عادي بل ونويت الصوم كمان. المشكلة إني خائفة أن ينسل أحد أخوتي من لسانه –خصوصاً عمور- ويفلت لسانه بكلمة أمام بابا.. ربنا يسترها

هـوّن... هـوّن
ربنا بيهــوّن
مع إني ردّ حوادث، لازلت غير مستوعبة ولا مصدقة وجسمي كله في حالة ارتجاف دائمة

بس تصدقوا.. السيارة (البي.إم.دبليو) كانت تحفة. يخرب بيت الكشافات بتوعها!!د

((:

15 comments:

Nerro said...

سلامتك..بس لو باباكي عرف مش مشكلة..بس المشكلة انك لازم تعرفي ايه اللي حصللك بالظبط...شوفي دكتور و كده

Mohamed Mehrez said...

الف سلامة عليكي
والحمد لله على النجاة

على فكرة نفس الحادثة دي حصلت لأخوية الكبير في شارع عباس العقاد
بس كانت عربية 128 ...ما هي حظوظ بقى مش أي حد تخبطه بي ام هههههههه
وبعدين الشاب الروش اللي خبطه كان ماشي في اتجاه عكسي...واخويا اختار انه ينط فوق الكبوت ونزل على رجله بردو

يلا الحمد لله...بس لازم تروحي لدكتور

Doaa Samir said...

Nerro

يا مرحبا يا مرحبا.. الله يسلمك يا نيرو

لأ.. مشكلة لأن أنا رد حوادث.. يعني لو اعتبرنا إن دي حادثة هتبقىـــــإحم..الحادثة رقم أربعة. والحوادث السابقة كانت من النوع الثقيل. حتى فيه واحدة كنا كلنا في السيارة بتاعتنا وواحد خبطنا وماما الله يرحمها وأختي الصغيرة اتوفوا فيها.. فبابا يا عيني شاف كتير وخلاص. وهو بيقلق عليّ لوحده خصوصاً لما في يوم من الأيام في الحادثة اللي قبل دي، اتصلوا بيه وقالوا له بنتك مدغدغة في المستشفى!! فما بالك ببعد كده؟؟؟ هيحـرّم عليّ أركب حاجة غير المترو اللي مش بحبه
ربنا يسترها



Mohamed Mehrez

يا أهلا بيك لأول مرة عندي
الله يسلمك.. الحمد لله بالفعل.. الحمد لله يارب.. لولا ستره كان زماني في خبر كان
بس لو على الحظ يا محمد، يبقى دي من المرات القلائل اللي أبقى فيها محظوظة.. واحدة صاحبتي كان ردها أول ما عرفت إنها بي.إم.دبليو الجديدة مش عارفة فئة ايه، قالت: يا سلااااام.. لو الواحد يتخبط بسيارة زي دي!! ولا أروع!!!! د
وصديق عزيز عليّ جداً أول ما عرف إني عملت حادثة فكان ثاني شيء يهمه بعد الاطمئنان على حالتي وصحتي، نوع السيارة ايه
أنا مانزلتش على رجلي.. نزلت على جانبي كله بس الخبطة الأولى كانت في رجلي، ثم نطيت وبقيت فوق الكبوت، ونزلت تحت
((:
بس قل لي.. هي الفيات128 بتعمل حاجة في البني آدمين.. يعني بتوجع وتخبط زي السيارت التانية؟؟ أصل شكلها ظريف، وأنيس أوي، وبيتوتي
كده "حونينة" يعني

Bent Masreya said...

يا خبر.. ألف سلامة ع البى ام دبليو
:P

الحمد لله، ربنا كريم يا دودو.. بس لازم تشوفى دكتووووووور
ماتسكتيش ربنا يخليكى

بس مكتوباك يا جميل :) تتخبطى بام دبليو.. ماتقوليش لحد بقى عشان الحسد وكده

انتى قافلة موبايلك ليييييييييييييييييييه

on_line_any_time said...
This comment has been removed by a blog administrator.
on_line_any_time said...

بسم الله الرحمن الرحيم
قل لن يصيبنا الا ما كتب الله لنا
صدق الله العظيم
نفس الحادثة حصلت معايا بين ميكروباص و موتوسيكل لسه نازل الصبح رايح الشغل و مستنى على الرصيف الميكروباص يمشى و لسه هايمشى نزلت من على الرصيف و جيت من وراه عشان اعدى و مش متوقع ان فيه موتسيكل جاى مخالف من جنبه المهم الموتسيكل دخل من جيب البنطلون بتاعى خلى البنطلون ثلاث قطع و اصبحت واقف برجل بدون بنطلون و رجل ببنطلون و كل ده و احنا لسه الصبح لسه بنقول يا هادى المهم ان بتاع الموتسيكل وقف يبصلى و يبتسم و طبعا مش هقف اتخانق معاه و انا برجل و رجل ربنا ستر و كنت لسه جنب البيت و طلعت غيرت و رجلى لغاية الان عاملة كدمة زرقاء

Lasto-adri *Blue* said...

لول يا دعاء
تحسيه السلاح الآخر، ماقدرتيش ع البى ام يبقى نديها عنتين حلوين بقى

:P

المهم بس حمد لله على السلامة وربنا ما يرجع الكلام دة لاى حد تانى

آمين يارب

hesterua said...

الف حمد لله ع السلامة
جيت سليمة الحمد لله

Doaa Samir said...

بنوتة مصرية


الله يسلمك يا زيزي... تخيلي كده لو كان حصل حاجة لعيون البي.إم الخضرا، كان هيبقى الحال ازاي دلوقت!!د
آه طبعاً ربنا كريم
أما الدكتور فدي آخر الحلول المطروحة عندي مني.. أصلي مش م النوع اللي أول ما تحصل له حاجة يهرع للدكتور وهو شايل كفنه وبيصوت على حاله!!... وبعدين أنا الحمد لله النهاردة أحسن من امبارح. طبعا لا تزال تباريح الألم قائمة.. بس الضرب أقل من امبارح.. ولسه جسمي كله مكسر طبعاً
الحمد لله

بس ولا يهمك
الحمد لله قدها وقدود
((:



on_line_any_time

أهلا بيك عندي لأول مرة
الحمد لله.. آه طبعاً كله مكتوب
ضحكتني والله... المنظر شكله يفطس م الضحك رغم إنه كان بلوى وسخيف أوي!! بس على كده بقى الجيب بتاعك واسع أوي.. كنت شايل فيه ايه؟؟!!د
الحمد لله ربنا بيسترها جداً بطريقة لا تتخيلها
اسأل مجربة كذا مرة
أهلاً بيك بين المدونين يا " ع الخط في أي وقت".. عايزين نشوف تدوينتك قريباً


بلو

ازااااااااي... ده كلام
قدرت طبعاً,, أديني واقفة أهو بفضل الله
دي راحت ولا جت حتة حديدة.. إنما أنا بني آدمة بروح وكده

الله يسلمك يا جميل
آآآآمييييييييييين يارب



أحمد البورسعيدي

ايه يا أحمد.... تروح وتقول عدوا لي؟!!!د
الله يسلمك
الحمد لله ربنا ستر وجت سليمة

rony_al3geeb said...

ألف سلامة عليك يا جميل .. عشان تبطلى تقولى انك عاملة زى الحصان .. شوفى الحسد بيعمل ايه

Epitaph said...

LooooL

الف سلامة عليكي يا دودو
وفي داهية البي ام دبليو
المهم انتي يا قطقوطة

احلي حاجة بقي
اخر جملة
الكشافات هههههههه ده اللي لفت نظرك يعني
هههه

الف حمد الله ع السلامة
قدر الله وما شاء فعل

salateenoo said...

الف سلامة يا دع دع ...بس بصراحة انا عايو احييكي على اختيارك....يعني بردو الواحد لما تخبطه عربية بي إم دبليو ...حاجة مش سهلة ....انتي تحمدي ربنا انو مخدش منك تعويض....بس بذمتك مش خبطة طعمها لذيذ....مش بي إم يا جماعة......

الف سلامة تاني يا دعاديعو

radwa osama said...

الف سلامه عليكي يا جميل

Doaa Samir said...

روني العجيب

الله يسلمك يا روني.. الحمد لله جت سليمة.. هي صحيح جت "كدمة" بس برضه سليمة.. وبعدين ايه علاقة الفرس الجامح باللي حصل؟؟؟ آه أنا كده ومازلت كده
وبعدين الواحد يتحسد على سيارة بي.إم.دبليو مش على صورة حصان مش موجود عنده!! ده يا دوب يا عيني موجود جواه وبس
!!
(:


Epitaph

لول يا لول..لأ -ثواني- قبل ما أرد عليكِ عشان مش أنسى.. تبقي تفكريني أسألك وإنتِ تقولي لي عن (إبيتاف).. ايه علاقتك بالنقش على شواهد الأضرحة يا آنسة؟؟؟
المهم، آجي للرد بقى
الله يسلمك.. آه طبعا الكشافات هي اللي لفتت نظري
أصلها واسعة وصافية وفيها دواير وسط بعضها كده وضوءها قوي وبتجيب لبعيد
((:


سلاطينووووو

لله يسلمك يا باشا.. آه مش كده برضه والنبي.. الواحد يختار ايه السيارة اللي تخبطه!! وبعدين ياخد تعويض -هو مين ده اللي ياخد؟- ماعلينا.. التعويض مني ليه إن شاء الله
بس الخبطة طعمها لذييييـ لأ..بيوجع.. لأ.. مش لذيذ
هي البي.إم اللي ممكن تبقى لذيذة بس لما أبقى جواها مش برّاها تحت عجلاتها أو واقفة باتحسّر عليها
ألف الله يسلمك تاني يا سلاطينووو


Radwa Osama

لله يسلمك يا مشمش.. على فكرة امبارح وأنا -في طريق عودتي وحدي- افتكرت اللي قرأته ليكِ.. وانتشلني نشلة محترمة من الهم اللي كنت بافكر فيه وعلاّني لفوووووق فابتسمت مع حالي.. ودعيت لك
(:

Moia said...

alf salama ya dodo :( ro7 le dr ba2a w tmeny 3aleky .. mesh t7'ly balaek ba2a :((
alf salam :)
*hug*