Sunday, September 10, 2006

كلنا ليلى، نظرية البسكوت بالفانيليا والشطة

نظرية البسكوت برائحة الفانيليا وطعم الشطة
VS
الخطـــوط المتــوازيـة


ليلى1 بحزم: أنا قلت له كل حاجة، وعرفته إني خدت بالي وفهمت
ليلى2 وهي مفزوعة: يا عبييييطة.. إنتِ كده بتخوفيه منك
ليلى1 بنبرة ساخرة ومستهجنة: ليه إن شاء الله.. شايفاني بنابين زُرق وقرن أحمر وباطلّع لسان نار؟؟
ليلى2: يا بنتي اسمعي الكلام.. خليكِ بسكوتة كده زي ما إنتِ وفوتي
ليلى1: ومين قال لك إني بسكوتة؟
ليلى2 بنفاد صبر: إنتِ كده؛ رقيقة وهادية وطيبة.. بسكوتة يعني.. وبعدين البنت لازم تبقى كده والراجل يحب البنت اللي كده.. مالهاش لازمة بقى تلبسي الطربوش وتبرمي الشوارب ويظهر عليكِ إنك فاهمة وعارفة وليكِ رأي في كل حاجة وشخصية!!د

**********

سرحت وأنا أسحب كل الهواء المحيط بي في نفس عميق، ما هي "ليلى1" تكون "أنا".. وتذكرت: كماإنه لما حاول يلف وقلت له: "أنا عقلي مش صغير"، اتنرفز وخبط بإيده ع التربيزة وقال لي: "بتعفرتيني لما تقولي كده، ما هو إنتِ مش فاهمة كل حاجة برضه"د
ولما حاولت أمتص غضبه بإني أقول له و-أنا أعني ما أقول-: " لأ طبعا مش فاهمة كل حاجة"... هدأ وأكمل: "وبعدين أنا أعرف أكتر منك بحكم إني أكبر منك وبحكم إني راجل وعشت تجارب أكتر منك!!د

سكتُ ولم أجد غير "لا حول ولا قوة إلا بالله" لتبلع وجعي وعدم تصديقي. وترددت في ذهني كلمات بهاء جاهين

باحلم بفعل الزمن
في الصخر والأجرام
والأحلام العظيمة
الملح ياكل مخي
زي مراكب حطام
زي موانئ قديمة
زي معالم جريمة
!!
أكلتني التنهيدة وتهت في حطام المراكب. وأنبت نفسي لأنها تمنت الملح يأكل "مخي"!! بسبب إني أفهم "شوية" وألمح بطريقة مسالمة وتلقائية -ووالله بدون أنعرة ولا فرد عضلات وبدون ما أقصد-. لم أدعِ الذكاء والفهم يوماً وأنا لا أفهم. كذلك، لم أدع الغباء يوماً لأرضي غروره
لم يستطع أن يستوعب أبداً أننا خطان متوازيان. بل كان يختلق لهما نقاط صدام وهو ناسي تماماً -أو ربما اختار أن ينسى- أنهما لا يتقاطعان إلا إذا عملنا نظرية جديدة في الرياضيات والهندسة

أصبح لا يملك غير أن يقول لي كلما ظهر لي منظور مختلف قليلاً أو كثيراً عن رأيه وبدأ كلامي يكون له طعم الشطة على لسانه، "مش واخدة بالك إن فيه أزمة تفاهم بينا؟".. ولكن تواتر الكلام و"لضم" خيوط أفكاري وأفكاره مع بعضها بانسيابية وهارمونية وبدون ما يقصد أحدنا كان يقول كلام آخر وأحلى. كان يقول إننا في أعلى درجات التواصل والفهم لكن لو كل واحد تذكر إنه خط مواز للثاني.. يلتقيان ولا يتقاطعان


http://laila-eg.blogspot.com


*************

16 comments:

BaTaBeeT said...

وبعدين البنت لازم تبقى كده والراجل يحب البنت اللي كده.
ma yewla3 el ragel !!
meen 2al en el bent lazem teb2a keda!!
e7na neb2a zai ma7na 3aizen welli mesh 3agbo .....
ma 3alina... nice post ma'am

Sampateek said...

نعم كلنا ليلي
لا تكوني بسكوتة بعد الان يا ليلي سهلة الكسر و البلع
بل كوني كما انت روح و عقل و كيان

سعيدة بانطلاقك يا ليلي
سعيدة بصراحتك
سعيدة بصدقك

الي الامام يا ليلي فقد انقضي عهد الصمت

MAKSOFA said...

كوني بسكوته وقت ما تحبي تكوني كده وكوني صلبه وقويه برضه وقت ما تحبي انت

Bent Masreya said...

يا بسكوتة، قصدى يا ديدى
:)
المشكة فعلا انه بيفضل يقول انا عايزظ احب واحدة ذكية
وعايز اتجوز واحدة تناقشنى
وعايز واحدة دماغها شغال
بس تقريا بيتصدم لما يلاقى حد كده، ومش بيعرف يتفاعل معاها
وتبقى الحكاية بالنسبة له ازمة حقيقة

وفى النهاية لما تدورى تطلع ان نانسى عرجم هى مثال المرأة الذكية اللى يقصدها

مع احترامى للنانسى وذكائها طبعا
:)

farida said...

مش عارفه أقولك إيه
لكن ممكن تكوني بسكوته
لكن لا تتركي الآخرين يهشموكي و لا حتى هو

كوني إمرأه صلبه في إطار المرأه الرقسقه الضعيفه جواكي

لا أقول لكي مثلي
و لكن كل منا بداخلها هذا الضعف
و الرجل إما همجي و يستغل هذا الضعف
أو يحبك حقا فلا تتصادما

farida said...
This comment has been removed by a blog administrator.
Lasto-adri *Blue* said...

لم يستطع أن يستوعب أبداً أننا خطان متوازيان


ودى فكرة ليلى اصلا
احنا مختلفين أه
بس فى الآخر واحد

ياريت يفهم بقى

Epitaph said...

كوني بسكوتة من صلب
:)

يا ليلي

Hope said...

One of the smartest and most accomplished women I met in my life was a very sweet "baskota"! She was Professor and Chairman of Pediatrics in my college, she was a very successful pediatrician and teacher and she was so sweet. Her voice was always so low and gentle and she always had a smile on her face and she had the best communications skills ever. She could say what she wanted to say and do what she wanted to do all the time, in a her own very gentle way, the "baskota" way. I always wanted to be like her, but I have a different nature :)

بعدك على بالى said...

تصدقى لو لعبتى اكروبات عالمية واخدتى حبوب الهنا (اللى هى خليط بين هيفا اليسا ونانسى) مع الاحتفاظ بثوب الاستاذة فاطمة على عقل وحكمة المستشارة نهى الزينى و.. من الاخر تشكيلة وصاية برضه حيقولك أزمة تفاهم...

soosa el-mafroosa said...

كوني كما انتي
لو بسكوته...خليكي بسكوته
ولو ثمرة شطه حارقه...خليكي كده برضه

و الا هتبقوا بتضحكوا على بعض و اللي بتخبيه دلوقت هيبان بعدين

99.9% من الرجاله عيزين بسكوته ..و بعدين بيلعنوا سلسفين البسكوته و اللي وقعهم فيها

سيبك ما فيش أحسن من الستات الجدعه

تحياتي

Violena said...

تذكرت رواية دارية لسحر الموجى وانا اقرأ هذا البوست

الخطان المتوازيان لا يلتقيان
كونا خطوطا متقاطعة .. القتيا فة نقاط وتباعدا فى الاخرى .. سيشفع لك فى النهاية انك تحاولين تقريب وجهات النظر


لا تجبريه على فهمك .. بل اجعليه هو يتمنى ان يرضيكى باى وسيلة

وليلى تستطيع

nirfana said...

برغم اننى علقت على العديد من التدوينات .. الااننى هان لا املك رد

لاادري السبب ايضا

bosbos said...

و حتى نظرية البسكوته دي كمان يا ريتها تنفع

ME said...

الراجل إللى عقلة ضيق هو إللى بيتصدم لما يقابل المأة الذكية اللى تناقشة وتختلف معاه .. بيتخض فعلاً

أصلا الواحدة مش محتاجة تغير من نفسها حاجة عشان أى حد .. إللى فعلاً بيفهم يعرف إن كل إنسان- سواء راجل أو ست - يقدر يكون بسكوتة وقرن فلفل على حسب الموقف و شعوره ناحيته

بس نجيب منين الناس لمعناة الكلام يتلوه

Geronimo said...

لو بنحب
مش محتاجين نكون متوازيين
ولا متقاطعين
ولا متنافرين
ولا متشابهين
لو بنحب
بنكون محتاجين نكون بعض
ده اللى لازم نفهمه